人人都知想健康就要飲多啲水，「一日要飲8杯水」呢句話，我諗大家都由細聽到大，但係係咪真係個個都做得到先？不過，依家反而聽多咗啲人話，水飲得太多其實都唔一定好，仲話會中水毒添！原來飲水都可以有咁多學問，依家即刻同大家逐一解構！
 
1. 尿液顏色清澈=飲夠水
如果你嘅尿液係正常淡黃色的話，咁就表示你已經飲夠水，非常健康；但如果你嘅尿液直程係呈透明的話，咁就表示你嘅身體已攝取過多水份，提醒你唔好飲太多水喇！
 
2. 做完劇烈運動後飲水=不足以補充電解質
做完劇烈運動又攰又口渴，仲出咗咁多汗，梗係要飲返多啲水、補充返水份架啦！係！無錯！做完運動飲水，係可以幫你調節體溫、預防中暑和缺水，但淨係飲水係唔足以補充你流汗時所流失嘅電解質。而且，做完運動即刻就飲咁多水，好容易會引發「急性水中毒」！導致頭痛、嘔吐、神志不清、癲癇症發作，甚至死亡。所以，做完運動之後，水要慢慢飲，最好係運動飲料和清水一齊飲，一齊補充；唔想飲咁甜的話，可以選擇天然嘅椰子水，同水一齊飲，可以補充埋鉀、鎂、鈉和維生素C，又唔洗擔心會攝出過多熱量。
 
3. 飯前/飯後飲太多水=肚脹脹
好多人為咗keep fit，飯前都會飲返杯水，個胃脹啲，就可以令自己食少啲；或是飯後都飲返幾杯水，當係清吓腸胃、清吓油膩感，但係如果喺飯前或飯後飲得太多水，反而會令你覺得腹脹、唔舒服，亦會沖淡胃液、稀釋胃酸，傷害消化功能，甚至出現胃下垂或擴張嘅情況，令脂肪更容易囤積喺腹部！
 
4. 超過日飲標準=中水毒
飲得太多水會中水毒，原來真係唔係講笑！平常人每日最少要飲8至10杯（每杯240mL）水；運動量高或居住在炎熱地區嘅人，所需嘅飲水量就更多；而超重嘅人，就係每超出標準體重10kg，就應該多飲一杯水。若你嘅飲水量超出每日標準，過多嘅水份或會稀釋體內鹽份，導致體液電解質失衡，使人出現「低血鈉症」，即水中毒嘅症狀，包括體細胞膨脹和身體持續處於低血鈉狀況，時間一長，當大腦都出現細胞水腫嘅情況時，人就可能會因為水中毒而死亡。
 
5. 飲得太快=水中毒
除咗飲得太多，飲水飲得太快都有機會出現水中毒。人如果喺唔缺水嘅情況下，快速而過量咁攝取水份，或會超出腎臟的排出能力，導致體內以鈉為主嘅電解質受到稀釋，水就會通過細胞膜滲入細胞內，導致細胞水腫，引發水中毒。因此，飲水要細細啖、慢慢咁喝，身體先唔會有水份不足嘅感覺，亦能促進新陳代謝。
 
6. 生病時飲太多水=弄巧反拙
病嗰陣個個都會叫你飲多啲水，以排出體內嘅毒素，但澳洲有一項研究指出，患有呼吸道感染嘅病人，喺飲用大量清水之後，病情唔單止無加快好轉，反引起身體其他功能嘅紊亂症狀。所以，有時飲太多水，對身體都未必係好。
 
7. 患有腎病人士/冬天飲得太多水=影響生活
大家都試過好急嗰陣要周圍搵廁所嘅痛苦，因此，飲得太多水，要經常跑廁所，對生活其實都會構成一定影響，特別係冬天、新陳代謝較慢嘅時候，水份無法透過出汗嘅方式排出體外，就要係咁去廁所；患有腎病嘅人士就更加如是，飲得太多水，會對腎臟造成負擔，甚至有可能引致尿道炎。
 
8. 中氣虛、陽虛、痰濕人士不宜飲太多水
唔同體質嘅人，飲食有唔同嘅宜忌，其中中氣虛、陽虛和痰濕3種體質嘅人，係唔適宜飲大量嘅水，否則會容易出現胃脹、食慾不振和腹瀉等脾虛水濕內停嘅症狀，重則更會出現頭暈、嘔吐和口角流清稀口水等水飲上犯嘅狀況。
 
飲得健康，都要飲得正確，飲水要「少量、多次、慢飲」，先會有利身體健康。大家跟足以下時間表，飲用相應份量嘅水，實會愈飲愈健康！
 

時間	份量	好處
朝早起身	空肚飲200至300mL嘅暖水水	身體咁多個鐘頭無攝取到水份，朝早起身飲返杯暖水，可以提振精神、清清腸胃。而且，早上習慣飲水，通常半個鐘後會有便意，有穩定嘅排便時間，小腹自然會消失。
餐前30分鐘	一杯（約240mL）	餐前飲杯水，可以避免過量進食。另外，水有助刺激交感神經系統，所分泌嘅腎上腺素可幫助消耗體內脂肪。
下午2點至5點	沒指定份量	呢個時段係兩餐之間嘅空腹期，同為飲水嘅最佳時段，因為呢段期間，人體嘅新陳代謝係最快。
沖涼前10分鐘及沖涼後15分鐘	每次約200mL	沖涼會令身體流失大量水份，所以沖前10分鐘飲杯水，可以畀身體補充足夠水份，亦能促進新陳代謝、避免口渴不適嘅症狀，以及降低沖涼期間中風嘅機率。不過，如果你身體唔缺水，飲唔夠200mL都無問題。沖完都唔好即刻飲大量水，否則會加重心臟負擔。
瞓覺之前	約200mL	血液中有7成係水份，身體缺水時，血液會變濃、黏稠，影響血流運行，所以好多人都係喺朝早6點至9點，差唔多瞓醒嘅時候，出現心肌梗塞或栓塞型中風。因此，臨瞓前飲水，可有效預防心肌梗塞和中風。

 
都市人平時忙到連水都唔得閒飲，但係忙還忙，都要顧吓自己身體架！依家畀埋個表大家參考，以後大家就無藉口唔飲水啦！

文：Noelle