熱門話題

8種狀況代表你不再年輕

刊登日期: 2018-04-20

現實係殘酷嘅,人通常都係喺不知不覺之下老去。可能你會話,唔係啊我都未到四十幾、五十歲,都仲後生啊!咁嘅話,勸你不妨細心觀察吓呢個世界,你會發覺有好多嘢已經今時唔同往日,你唔認老都唔得喇!

1. 身體愈嚟愈唔捱得
以前通完頂都仲可以去睇日出、食埋個靚早餐先返學,依家瞓少幾粒鐘已經唔得掂,返工冇精神,開會恰眼瞓;個胃冇以前咁擦得,想話食buffet食返夠本都難;以前想隊啤就隊啤,依家淨係飲唔飲珍珠奶茶都要左諗右諗,吓吓都怕太甜,怕太肥,怕唔健康。梗係啦!年紀唔細,係要開始顧吓自己身子架喇!

2. 開始為未來而憂心
從前每日只係需要諗今晚食咩,放學去邊度wet,考完試去邊度慶祝;依家人大咗,多咗煩惱,諗嘅係今個月夠唔夠錢畀家用,儲唔儲到錢供首期,仲未有男/女朋友,係咪要孤獨一世,依家份工人工係幾好,但埋沒咗自己當初嘅理想,值唔值得呢?父母開始多病痛,係咪好快就要離開自己等等。唉,不再年輕的時候,係咪就只剩下煩惱和傷心。

3. 身邊的人都要相繼結婚
朋友圈個個情侶一對對,好多都漸漸拉埋天窗,甚至生小朋友,偏偏得你一個仲係單身狗。人愈大,就愈收得多紅色炸彈,潑出去嘅人情,分分鐘夠你食兩個月飯。有時候,亦會少不免收到朋友患病離逝嘅消息,呢啲都係人長大時,必須要面對的現實。

4. 顧慮較以前多
從前年少輕狂,好多嘢都可以話做就做,話去就去;依家淨係問你聽晚去唔去飲嘢,你都要考慮兩個鐘;鍾意嘅歌手搞簽名會,你又話:一把年紀,仲追咩星啊!想話一個人去旅行散吓心,都要擔心呢樣擔心嗰樣,考慮咗成日,最後咪又係嗰句:唔好啦!聽日仲要返工啊!

5. 曾經最close嘅朋友都冇曬聯絡
返咗工之後,大家都各有各忙,幾親密的朋友,也漸行漸遠,係睇社交平台先知道對方的近況,就算想同對方見個面、敘吓舊,都可能因為時間唔夾,或是怕dead air而約唔成。所以,如果你同你班朋友仲keep住聯絡的話,一定要好好珍惜,唔好等到大家疏遠咗先嚟後悔。

6. 唔知依家潮流興乜
你仲以為自己好in、好跟得上潮流?其實你已經喺不知不覺間同潮流脫咗節。唔知依家啲後生仔女講緊嘅潮語係咩意思;唔知佢哋興玩咩手機遊戲;唔知家吓有咩新蒲點;咩小鮮肉新韓團全部都噏唔出叫咩名,啲人年紀仲細過自己的話,你就唔好再叫自己做潮流達人喇!

7. 喜歡嘅明星都要結婚生子和淡出
曾經幻想某某明星偶像係自己老公/女朋友,如今夢要醒了。在你成長的同時,喜歡的偶像都會一個一個有自己的家庭,甚至漸漸淡出娛樂圈,有天更會老去逝世。或者人在不再年輕的時候,就要習慣說再見。

8. 只求一切簡簡單單
細個嗰陣總係希望所有嘢都轟轟烈烈:生日要大搞,談戀愛要刻骨銘心,紀念日要舖張;人大咗之後,生日?求其食餐飯得啦!洗乜買咩蛋糕啫?咪又係咁過;拍拖?簡簡單單喺屋企煎埋牛扒得啦!出街食candlelight dinner好貴架!Weekend去邊度wet?喺屋企抖吓吧啦!歎喺梳化度,睇吓戲,食個麵,已經係人生最大嘅享受嚟架喇!

人年紀愈大,就會伴隨住更多的煩惱,亦會變得愈來愈現實。雖然係咁,盼望你仍然記得最初的自己,開開心心咁走往後的人生路啦!

文:Noelle


標籤:
不再年輕
結婚
人生路
查看全部 熱門話題


你可能感興趣