啲HR一年收咁多份CV，成日send完CV都冇回音，覺得自己份CV俾人掃完一次就掉？咁究竟點先可以從云云眾多嘅CV堆入面突圍而出呢？試下跟著以下嘅方法去改變你份CV，將平平無奇嘅工作內容，改寫成為你嘅工作成就啦！

明白兩者之間有咩分別
一個工作內容係指寫低你做過乜嘢，而個人成就就係指你做得幾好。例如，「organized events」係一個工作內容，但係「raised $200,000 by selling out tickets to a 500-person charity event」就係一項成就。

咁點解依樣咁重要呢？你想同其他人講一啲佢哋唔會由你份CV上面睇到嘅嘢。最緊要嘅係，唔少HR睇緊你嘅job title已經會知道你大概嘅工作內容。例如一個行政助理係負責聽電話，執files，同埋提供客戶服務咁樣。所以將依啲係人都知嘅工作內容當成你份CV嘅bullet point嘅話，只係會嘥咗啲位。反而，如果係寫上你嘅個人成就，就可以show俾人睇你嘅能力去到邊，簡單啲嚟講，就係推銷你自己。

依家你知道兩者有咩分別，咁你仲想唔想改你份CV呢？

製作清單
一開始嘅時候，寫張list幫你準備下到底要寫咩好。係毎一個職位上面，都諗下以下嘅問題：

• 除咗普通嘅工作內容之外，我仲做過啲乜嘢extra嘢呢？
• 同其他同事比較，我有咩咁突出呢？
• 老細有冇指出過我做得好呢？係邊項工作同點解呢？
• 我攞過乜嘢獎項同埋讚賞呢？
• 我有冇幫手改善過乜嘢呢？
• 我解決過乜嘢問題呢？
• 我係咪成日都meet甚至乎係遠超啲目標同quotas呢？
• 我有冇幫公司慳過錢？
• 我到底叻啲乜嘢呢？

用數字說話
然後，將你寫好嘅list，配合越多嘅實質數字就越好。你嘅工作影響到其多人？你嘅工作能力遠超目標嘅幾多巴仙呢？除咗講你自己有效咁管理到盤數，你應該寫出自己管理嘅大約銀碼，同埋寫得出你慳咗幾多錢。

將你嘅個人成就數據化，你唔單止可以令人更易明白你做過啲乜嘢，你仲可以令個HR有一個大致嘅印象，知道你嘅能力同埋責任心大約係點。

利字行頭
最後，行多一步，講埋你嘅個人成就點樣貢獻到俾你嘅老細或者係公司。咁樣做，唔單止可以有效咁講得出你識得做乜嘢，但仲可以直接話俾個HR聽你可以為公司帶嚟啲乜嘢。任何人都想知佢請個人可以有咩用嘅。

所以，當你係張list到寫咗「prepared 30 client reports each month」，你可以寫做「created and prepared 30 weekly and monthly status reports to ensure clients consistently received timely and complete information」

當個HR睇緊依句句子嗰陣，佢就可以知道你係有特定嘅方法去保證客戶得到服務嘅。當你包括咗一啲好處嘅時候，咁你就可以推銷你俾到乜嘢利益俾間公司啦。

一份充滿著個人成就嘅CV，係可以展示到你嘅能力同埋真係做到乜嘢，最緊要就係保證你可以有機會贏到份工。

資料來源：The Muse