喺公司入面，新人同資深同事一齊工作係好自然嘅事。理想情況下，年輕人可以帶來新動力，資深同事就將多年經驗傳承落去，互相補足。不過，現實中大家成日口中嘅「老屎忽」——即係只懂得指揮、唔願聽人意見嘅前輩——仍然存在。咁心理學上又點解釋呢個現象呢？

認知心理學有個概念叫「知識傳遞」，包括分享同吸收兩方面。分享知識就係資深同事願唔願意將經驗交俾後生；吸收知識就係佢哋肯唔肯聽後生人講。

根據 Anne Burmeister 與研究團隊的調查，訪問咗 450位來自不同年齡層的員工（19至66歲），結果顯示：

• 年紀較大嘅同事：比年輕人更有動力去分享知識，但能力有限，未必能有效傳遞。
• 吸收知識方面：年紀大嘅同事動力和能力都比年輕人低，換言之，佢哋唔太願意聽人講嘢。

呢個研究證明，年紀大咗確實會傾向只想教人，而唔太想被教，某程度上就解釋咗點解「老屎忽」現象咁普遍。

不過，知道咗問題唔代表冇得改善。Burmeister 建議，企業應該主動介入，鼓勵資深同事同年輕人合作，肯定後生提出嘅意見同知識，令雙方互相尊重，知識交流更順暢。咁樣做，就可以減少「老屎忽」出現，令職場氣氛更健康。

文：特雷弗＠ECjobsonline 編輯部

參考資料：Burmeister, A., Fasbender, U., & Deller, J. (2018). Being perceived as a knowledge sender or knowledge receiver: A multistudy investigation of the effect of age on knowledge transfer. Journal of Occupational and Organizational Psychology, 91(3), 518-545.