出到嚟社會做嘢，好多時真係識人好過識字，「關係」呢一樣嘢，睇落好似冇咩用，但喺危急關頭，分分鐘可以救你一命！例如當你臨時臨急要book個場地搞活動，咁啱又識人係酒店高層，可以幫你留間function room，你話幾好呢！又例如你個客想睇XXX嘅演唱會，咁啱你識人係贊助商，可以畀免費飛你，唔洗你周圍撲飛，你話幾正！睇到呢度，係咪終於都知道人脈嘅重要性呢？咁在工作上，究竟點先可以拓展到人脈呢？

1. 多參與應酬活動
我知好多人都唔鍾意去應酬，成晚行行企企冇嘢好做，又要周圍陪笑，真係畀多一倍人工都唔多想去！雖然應酬活動真係好無聊，但不得不說真係可以識到好多人，同行、唔同行嘅都有，就算大家喺現場冇咩交流，但話曬都交換咗卡片，save低對方嘅contact，總有一日會用得着！

2. 留下深刻印象
無論係對客人還是同業，第一印象都是相當重要的！客人對你有好印象、有好感，你自然就會建立起口碑，對方便會將你介紹畀其他客人，你的客源和人脈自然會愈嚟愈廣；同樣，同行見你份人咁nice，同你又咁投契，以後有咩活動實會預埋你，你又可以識到更多新朋友，要拓展人脈就話咁易啦！

3. 從培養興趣中找機會
投其所好，從來都係同人打交道嘅最佳方法，聽落好似好委屈自己咁，其實同發掘興趣差唔多架啫！讀書時期，我哋都會為咗識多啲朋友，參加唔同嘅社團啦！參加得耐咗，可能自己都慢慢喜歡上彈結他、踢波等等。同一道理，耐唔耐去gym room、club度，同其他人一齊做吓運動、飲杯嘢，話唔定都會識到志同道合的朋友之餘，仲可以為自己找來許多工作和合作機會！

4. 尋找推薦來源
為咗份工，打工仔梗係想有幾多客就搵幾多客，但與其花時間在尋找客源上，不如積極主動啲，鼓勵客人如果佢哋身邊有親朋好友需要這樣的產品或服務，歡迎佢哋隨時聯絡你，咁唔單止可以免卻直接向對方推銷產品服務的進取性，仲可以順便建立能為你帶來商業機會的人際關係，成功拓展人際網絡後，機會更會自己搵上門添！

5. 保持後續聯絡
結識對方以後，不要忘記保持後續聯絡！得閒吹水之餘，亦不妨提出一啲雙方都感興趣的合作項目，睇吓大家有冇合作空間。而且，如果你應承咗對方會幫佢作介紹，就一定要做到，唔係就會畀人覺得你冇信用架喇！如果你冇同對方keep contact，可能就會浪費咗一個拓展人脈嘅機會，既然前一日大家咁好傾，咁就一於食住個勢喇！

6. 引薦他人
就算你發現對方同你嘅業務冇咩關係，但現場或者會有其他人有興趣，咁你就不妨做個中間人，介紹雙方認識，咁可以幫助你好似滾雪球咁，建立良好而廣大的業務聯絡關係。

7. 主動出擊
出席應酬活動，不應驕矜自滿，亦唔好一直坐喺角落頭，等人主動埋嚟同你講嘢。與人交談時，記得保持友善和開放的態度；見到有人一個人坐喺度，亦可以主動啲行過去同佢打聲招呼。努力識多啲人，先唔會錯失良機架嘛！

8. 為自己設定目標
點講都好，應酬活動唔係咩社交聚會，你去得都係想識多啲人，睇吓有冇合作機會架啫！因此，出門前你應為自己set一個目標，例如要交談的人數、要派出的卡片數量等等，咁樣去應酬先有火架嘛！

9. 別預先設定好討論話題
拓展人脈唔能夠心急，唔好試圖要喺現場達成啲咩交易，搵長遠生意就一定要畀啲耐性，你去應酬嘅主要目標應該係認識更多人，攞到佢哋嘅contact之後，先慢慢開發潛在嘅合作機會。

出席應酬活動攰就係攰啲，但識多啲人，不論係對個人嘅社交生活，定係工作，都有其好處，大家冇機會合作都唔緊要，咪當識多幾個朋友囉！

文：Noelle