見工係人生大事，緊張到語無倫次絕對正常。但有時一個失言或小錯誤，就可能令你失去機會。其實唔需要太絕望，人人都會犯錯，最重要係懂得「補鑊」。以下6個方法，教你點樣喺不同情況下即場執生，令錯誤變得不再致命。

1. 不小心爆粗
講到興起可能一時口快快，但千祈唔好扮冇事。最好的做法係立即道歉，承認自己口不擇言，並表示歉意。勇於承認錯失反而會令面試官覺得你有責任感。

2. 帶漏文件
面試要準備好多資料，偶爾遺漏都係人之常情。記得主動同 HR 說明，並即時提出後補，不要等對方問起先解釋。主動處理能顯示你有誠意。

3. 遲到
遲到係大忌，但如果真係遇上意外，唯一補救方法就係誠懇道歉。唔好推搪藉口，承認錯誤並表明自己盡快趕到，態度真誠往往能挽回部分印象。

4. 錯過面試電話
有時因環境嘈雜或誤以為係廣告電話而錯過面試通知。遇到呢種情況，立即回電並禮貌解釋，主動要求重新安排面試即可。

5. 無問題可問
面試最後通常會問你有冇問題。若一時想唔到，可以補一句：「我需要時間消化，之後可唔可以透過 email 再請教？」咁樣既能顯示你有思考力，又能建立後續聯絡。

6. 講錯公司背景
網上資訊未必準確，講錯公司資料難免尷尬。遇到呢種情況，記得表明自己有做功課，並補充一些最新新聞或發展，顯示你仍然有心了解公司。

犯錯唔可怕，最重要係懂得認錯、補救，並從中學習。只要態度誠懇，勇於承擔，錯誤反而可以成為展現你成熟與抗壓能力的機會。

文：Noelle＠ECjobsonline 編輯部