好多打工仔去見工，都會想盡辦法同HR「傾兩句」，打探吓公司文化、OT情況、甚至幾時會有offer。不過，HR見慣世面，講嘢通常都唔會直接，仲可能反問你，令你措手不及。其實，佢哋每一個問題背後都有用意，識得拆解，就唔會中招。

1. 幾時返得工？忠誠度測試
HR問你「幾時返得工？」唔代表穩請，而係想知道你會唔會即刻拋棄舊公司。離職者最好答「隨時可以返工」，顯示已準備好；在職者則要清楚交代通知期，表現責任感。

2. 點解離職？ 價值觀審視
呢條問題係HR必問，用嚟了解你嘅穩定性同價值觀。避免直接講人工低、壓力大或同事唔夾，反而要用正面角度，例如「希望尋求更大挑戰」或「想發揮專業技能」。

3. 點解會揀我哋公司？真心程度考驗
看似八卦，其實係測試你有冇做功課。若能講出公司文化特色、行業地位，甚至同自己理念契合之處，就能顯示你真心鍾意呢間公司，HR自然加分。

4. 你嘅expected salary係幾多？信心與行情
最考功力嘅問題一定係「你嘅expected salary係幾多？」太高顯得自負，太低又似貶低自己。新鮮人可以填比市場平均稍高，顯示自信又合理；有經驗者則要根據行業行情，講得有理有據。

5. 「洗唔洗成日OT？」「睇情況囉！」
當你問「洗唔洗成日OT？」HR通常唔會直接答。如果佢話「唔多OT」，代表公司想吸引人；如果話「睇情況」，基本上就係有OT，只係長短問題。

6. 「有offer嘅話會再通知你。」暗示機會大
如果HR姐姐咁同你講嘅話，咁就真係恭喜你喇！睇嚟你都有啲機會！HR會咁樣同你講，都只係想你隨時ready聽電話、收offer，畀定心理準備你，遲啲返新工。倘若對方仲問埋你：「識唔識搭車走啊？」、「廁所係右手邊啊！」，咁應該都係請你架喇！相反，見完工，HR淨係同你講句「bye bye」、「門口喺前面」，意思好明顯啦！即係叫你過主啊！

7. 用電話通知你嚟見工
大部份公司都會係由HR逐個打電話，通知啲人上去見工，點解唔用email？因為透過對答，可以預先知道你係一個點樣嘅人：會唔會打極畀你都係成日飛咗去留言？你講嘢會唔會好冇禮貌？唔該都唔講一聲？問啲問題會唔會好小學雞等等。所以話，HR打嚟叫你去見工，其實已經算係第一round 嘅interview，有啲人就係咁被淘汰咗，自己都唔知。

大家去見工嗰陣，都會想盡辦法同HR打交道，探聽吓口風，HR姐姐見慣世事，講嘢通常都好間接，有時甚至會問返你嘢嚟考你！所以，想成功突圍，就要準備好答案，睇穿背後用意，避開陷阱，先至有機會攞到offer。

文：Noelle＠ECjobsonline 編輯部