好多打工仔都會趁住新年前後諗住轉工，當係一個重新出發嘅機會。不過，搵工係咪只要人工高、福利好，就等於「筍工」呢？其實未必。最重要係份工適唔適合自己，能唔能夠滿足你嘅期望。高人工但冇得發揮，未必比一份真正合心意嘅工好。以下五個標準，可以俾大家搵工時參考。

1. 薪水
人工始終係打工仔最直接嘅考慮。生活艱難，有得揀梗係希望人工高啲。但重點唔係貪心，而係要對得住自己多年累積嘅經驗。理想情況下，每轉一份工，薪水都應該有進步，咁先算係合理。

2. 發揮機會
完成一個大型項目雖然辛苦，但成功感同滿足感係無可取代。能否發揮所長，往往決定你會唔會想長期留低。若果份工只係叫你打文件、影印，冇挑戰冇價值，做落去都唔會快樂。

3. 擅長範疇
最好根據自己專業去搵工，做起上手快，亦容易表現。雖然嘗試新事物係好事，但冇相關經驗可能令你花好多時間適應，仲可能落後其他同事。除非你真係想挑戰自己，否則未必值得冒險。

4. 工作環境與工作文化
面試時可以留意公司文化同工作氛圍。如果同事懶散、HR答非所問，環境又混亂，咁大機會唔係好地方。但如果同事認真、HR有交代、環境企理，咁入去做應該都唔會差。

5. 公司能否配合人生規劃
除咗工作目標，人生目標都好重要。如果公司願意配合你嘅計劃，例如支持你去 working holiday、結婚生仔時提供彈性安排，甚至鼓勵你兼顧家庭，咁就係一間好公司。即使未必做到百分百遷就，但只要願意溝通，氣氛融洽，都值得考慮。

搵工前，不妨先寫低自己嘅目標同期望，再用「checklist」方式比較唔同公司。希望以上五個標準，幫到你揀到一份真正適合自己嘅工。

文：Noelle＠ECjobsonline 編輯部