有上進心嘅打工仔，追求嘅唔止係「穩定」，而係挑戰同突破。要想上位，唔係話易，亦唔係話難，但一定要具備以下三大條件：

1. 人脈
「出外靠朋友」呢句喺職場同樣適用。晉升機會往往優先留畀識得你嘅人，因為佢哋了解你嘅性格同做事方式，合作起嚟更放心。要建立好人脈，就要跳出自己圈子，主動結識唔同背景嘅人。遇到有人講人壞話，記住唔好亂加把口，以免無意中得罪人。相反，如果有能力幫人，就唔好怕蝕底，因為你嘅好意會被記住，慢慢累積愈來愈多「貴人」，職場路自然更順。

2. 能力
有貴人相助固然好，但最終都要靠自己實力。只有能力夠強，別人才敢放心交畀你做，同事亦會信服你。提升能力要先認清自己嘅優點同缺點，發揮所長，同時誠實面對不足並積極改善。唔識嘅嘢要謙虛請教，唔好逞強。每一個細節都要用心做好，因為小事往往最能反映責任心同專業水平。正所謂「長江後浪推前浪」，要上位甚至保住個位，都要靠真本事。

3. 學歷
雖然學歷未必係最重要，但始終係基本入場券。學歷代表你掌握咗相關知識同理論，能夠為工作提供方向。香港係知識型社會，僱主睇學歷係常態。現時大學生遍地，更有唔少人畢業後繼續進修，你係老闆會點揀？再者，學識本身亦係能力嘅一部分，所以即使冇大學畢業證書，都值得考慮報讀相關課程，增值自己。

人脈、能力、學歷三者兼備，升職上位自然事半功倍。祝大家事業有成，步步高陞！

文：小C＠ECjobsonline 編輯部