職場資訊
【政府筍工】政府統計處請時薪訪問員 每小時高達$101
刊登日期: 2018-01-24
史上最強散工又嚟喇！事關政府統計處琴日刊登咗招聘廣告聘請訪問員，時薪高達$101！做足一頭半個月、密密返工的話，分分鐘可以賺到過萬銀！只要有DSE學歷就申請得！仲等咩？仲唔快啲去馬？
根據公務員事務局的網頁，訪問員的時薪為 $101。申請人只要DSE 5科（包括中、英文）考獲level 2，或具同等學歷；能操流利廣東話、普通話和英語；並懂得基本電腦操作，便符合入職條件，具備相關外勤統計工作經驗的人士，將會獲優先考慮。
時薪訪問員的職責，主要是在外勤統計主任的督導下，透過電話和上門訪問，向工商機構搜集統計資料和協助受訪者填寫問卷，開頭係咁打電話可能會比較chur，之後出外勤就會輕鬆啲。獲取錄人士，會按非公務員合約條款受聘於2018年的4月初至5月中，若工作表現良好及部門有服務需要，受聘人會獲考慮受聘於下個季度的統計調查 （暫定為2018年7月初至8月中）。訪問員的工作時間為星期一至五，9:15a.m.至5:15p.m.（每天7小時，因應工作需要，工作時間可能改為11:30a.m.至 7:30p.m.）。工作地點為香港灣仔港灣道12號灣仔政府大樓20樓或政府統計處的其他辦工地點，以及外勤期間被抽選的機構所有地點。
面試方面，聽說會叫你讀段英文和普通話、問速成/倉頡碼，同問吓工作經驗咁，相關經驗可以好闊，識製作問卷、返過電話中心、做過室外場地勘探都可以係相關工作經驗。屆時亦有機會問到街道名和地點，睇吓你識唔識路，諗住apply嘅要有心理準備喇！
有興趣人士，可於2018年1月29日晚上11:59以前，把申請書連同文憑/證書副本、學業成績副本及工作證明副本，寄送至香港灣仔港灣道12號灣仔政府大樓20樓政府統計處勞工統計調查組（一）（請註明「申請時薪訪問員職位」）。申請表可向民政諮詢中心或就業中心索取，亦可從公務員事務局網站http://www.csb.gov.hk下載。如獲邀參加遴選面試，申請人會在截止申請日期後的4星期內收到通知。聽講每次請訪問員都爭崩頭，祝大家好運喇！
時薪訪問員職位詳情：http://bit.ly/2E3MWmJ
文：Noelle
熱門空缺
