「魚唔過塘唔肥」，好多打工仔喺年尾攞完花紅之後，都會開始蠢蠢欲動，諗住轉工搏新機會。要一擊即中，面試表現一定要Sharp醒，否則就算有好履歷，都可能因為準備不足而失分。以下幾個重點，幫你喺面試前做足功課，避免浪費機會。

做好資料搜集
面試前冇做好資料搜集係大忌。如果你對公司認識不足，僱主自然會懷疑你嘅誠意。建議花少少時間上網查閱公司背景、翻閱年報，了解業務範疇同工作性質。咁樣不單止可以令你答問題更有方向，仲能顯示你對職位有真正興趣。

回答要完整
面試時回答問題唔好一句起兩句止，太簡短會令僱主覺得你冇準備。既然僱主花時間面見你，代表佢覺得你有一定條件適合，所以希望更深入了解你。即使係簡單問題，都應該加以解釋，展示你嘅思考同經驗。

勇於發問
好多僱主喺面試尾段都會問：「你有冇問題想問？」如果你話冇，印象分一定會低。其實呢個係表現你對公司有興趣嘅好機會，可以問公司發展方向、團隊文化或者職位挑戰，令僱主覺得你真心想加入。

保持輕鬆心情
面試時千祈唔好講自己好緊張，咁樣會俾人壞印象。想放鬆啲，可以試下入大廈前聽一首輕鬆嘅歌，令自己心情平靜。保持自然、自信，會令你表現更好。

年尾轉工潮，面試係打工仔嘅必經關卡。想成功，記住要做足資料搜集、回答完整、勇於發問同保持輕鬆心情。準備得好，就能夠一擊即中，為自己爭取更好嘅職場機會。

文：Jamie＠ECjobsonline 編輯部