辭職唔撈聽落好瀟灑，但要做一個咁嘅決定，其實好唔容易。首先你就要搵一個可以說服到上司、說服到自己嘅辭職理由，如果唔係，一離開左安舒區、冇左份糧，你就會後悔、開始懷疑自己辭職到底係咪啱架喇！所以，千祈唔好話唔想做就唔做，辭職都需要一個好理由架！

1. 進修自己
好多人都係出左黎社會做野，先知道自己有好多野都唔識、有好多不足，便冒起想再讀番書嘅念頭，充實番自己。進修其實係一個十分理想嘅辭職理由，不過大家要三思自己係真係想擴闊知識，定係純粹想逃避工作先至去讀書。

2. 嘗試其他範疇
在職場上接觸到其他領域的工作；因好奇而產生的興趣；甚至係因為一次偶然而發掘到的長處，都會驅使我地去嘗試其他範疇的工作。其實，有時候長期留守在同一份工作，的確會令人缺少左新鮮感，工作會變得枯燥乏味。所以，轉換一下工作環境，嘗試下不同的工作崗位，都未嘗不是一件好事。

3. 欲尋求突破
喺公司冇發揮、冇成就感，但又不甘安於現狀？看來而家呢份工滿足唔到你嘅上進心。計我話，勇敢啲突破自己，離開comfort zone，去搵一間賞識你能力的公司，做一份有挑戰性的工作，一定比守株待兔來得好。

4. 健康理由
因健康理由而辭職，唔一定係指你有咩病而唔番得工，可能只係壓力太大、工作時間太長，導致你心理和精神狀況不佳，仲出現職業病，搞到腰痠背痛姐，但係死忍難忍真係唔係辦法，長期受壓只會愈發嚴重。不如趁早比個機會自己休息下，抖番一頭半個月，先搵番份輕鬆啲嘅工再拚過啦！

5. 現時的工作不適合自己
一開頭踏入職場，咩都未試過，唔知自己適合咩工作乃是人之常情。不過，做做下自然就會知道自己想要啲咩、咩先至啱自己。所以，工作一段時間後，發現而家份工唔啱自己、想轉工都好正常。呢個時候，唔需要太擔心，放膽去作出改變啦！只要目標夠清晰、知道自己想點就絕對冇問題。

6. 想自己出來創業
好多人嘅夢想都係自己出黎創一番事業、自己搞小本生意、開一間屬於自己嘅舖頭仔。其實有理想、有計劃就不妨勇敢踏出多一步，將夢想化為行動！之但係，凡事都唔可以咁衝動，你都必須有曬全盤構思、有曬預算先可以take action，否則辭職只係魯莽行事。

7. 人生規劃理由
唔少女士辭職都係因為即將要踏入人生的另一階段：準備結婚、生小朋友、做全職媽媽。雖然現時社會提倡兩性平等，但我相信好多女士都會想為家人付出多啲，見證小朋友的成長、親自照顧佢地，工作就自然擺埋一二邊，家庭和人生規劃便成了最佳的辭職理由。

辭職需要勇氣同承擔之外，仲需要一個合宜的理由去說服老闆和你自己。辭職後的打算，亦應該預先計劃好，不然你貿貿然唔撈，只會係一個不負責任的行為。

文：Noelle