面試來來去去都係問嗰啲，唔係自我介紹，就係有咩長處，點解想加入我哋公司。不過，當中總有幾條比較刁鑽，唔知應該點答先好嘅問題。就睇吓下列常見難題同拆題方法啦！
1. 你有咩弱點？
要答得嚟唔會太自暴其短，可以針對翻唔太影響申請工作嘅短處。例如見客戶服務呢類型前線工作嘅可以話「唔太知後勤統籌工作點處理」。想令面試官覺得你係個積極進取嘅人，就要喺講完弱點後，再講翻改善方法。
2. 點解要辭職？
如果係因爲人工待遇而亂職或者公司有幾唔好，就唔好講，否則對方只會怕請你後又嫌待遇唔好，好快跳槽，同會唱衰公司。如果因爲私人理由，好似健康、家庭等，之後強調依家已經冇問題，可以接受新挑戰，對方放心。講開新挑戰，如果原因純粹係想有新挑戰就太大範圍，應該要再具體啲，好似應徵嘅職位同你期望嘅有工作有咩吻合。
3. 值得俾呢個人工你？
老細睇完預期薪金，再話：「其他人係咁多錢（比你所寫嘅低）喎。」，或者直接質問你點解要俾咁多人工。如果唔係太過份，只要心平氣和咁講自己嘅經驗同人工係掛勾到，或者市價都係咁上下，一般都係冇問題。
4. 同邊類人最難相處？
無須遮遮掩掩，只要照直答。不過言辭中要保持風度，唔好踩人。最好講埋改善相處嘅方法就最好。
5. 你好似冇呢類工作經驗，點樣做好呢份工？
啱啱畢業嘅求職者通常都會俾人問類似嘅問題。或者未有太多相關工作經驗，不過讀書時已經努力參加一啲同行業有關嘅活或者做有關嘅兼職，再講過程嘅有咩得著可以運用到應徵嘅工作上咁就得喇！
輕鬆拆解以上難題，面試就輕而易舉！
文：小C
11 Jul 2025 
Contact Us
Notice
Back to Top
中文