職場資訊
國泰缺人 請「媽咪級」女士運貨
刊登日期: 2015-03-20
機場勞工短缺，向來係唔少航空公司嘅一大難題，國泰（293）旗下航空貨運站，竟然諗到條絕世好橋請人！貨站開業兩年以嚟，原來請咗唔少「媽咪級」女士返工，國泰航空服務行政總裁高繼維話，貪女士們夠細心。
貨站二○一三年底投入運作後，昨日第一次開放畀傳媒參觀。華華發現貨站內有唔少女性工人。高繼維解釋，機場請人一向好難，於是透過外判商，請咗唔少女性返工。依家一千八百名員工中，約有四成係女性，即大約七百人，唔少係家庭主婦，佢哋送完仔女返學，就去返工幾粒鐘。
一般人或者會擔心，做貨站工人會唔會好辛苦，或者係男士專利。高繼維講，傳統上，貨站有九成員工都係男人，但國泰特登安排好多冇咁粗重嘅工種畀女士，好似開鏟車、檢查貨品等，佢讚女士一般比男士細心。
貨站廿四小時運作，佢話呢種輪班工作方式好有效，人手尚算充足。
文：蘋果日報
熱門空缺
