職場資訊
【泰版馬爾代夫】麗貝島平玩水上活動睇唯美日落
刊登日期: 2016-08-26
話咁快8月都差唔多完，打工仔應該plan緊點清哂啲年假，去旅行一定係香港人首選，咁去邊好？韓國同台灣就去得多，日本就雖然多野食多野玩，但去一次肯定會覺得肉赤。計我話，放假最重要是暫時拋開香港繁忙又急速的生活節奏！旅行不應該只在於行街shopping同食野！而是盡情享受假期的舒適！乜而家仲有人間天堂係又靚又舒服又有野玩有好野食而冇咁多遊客架咩？唔講唔知！真係有架！答案就是位於泰國南邊的麗貝島（Koh Lipe）！
唔少香港人都鐘意去泰國度假、玩下水上活動，但麗貝島就應該唔係好多人聽過或者去過喇！麗貝島是一個位於泰馬邊境沙敦府的海島，海水清澈得見底，沙灘的沙質又靚又滑，度假屋精致又特別，物價又不算貴，仲有必睇的日出日落！所以不怪得佢有個超有詩意的中國譯名 --- 李白，仲有人稱佢為泰國的馬爾代夫！但因為麗貝島的交通不便，遊客較少，比較僻靜，所以趁佢仲未成為商業旅遊區前，大家不妨考慮下今個暑假去一趟麗貝島，享受下人間仙境！
麗貝島點去？
去麗貝島唔算方便，唔似平時搭直航機幾個鐘就到，但係有得睇靚景，咩都抵番曬啦！前往麗貝島，由馬來西亞的浮羅交怡出發會比較方便快捷。每年的10月中至隔一年的5月中，在浮羅交怡的瓜鎮碼頭和Telaga Harbour Marina會有開往麗貝島的渡輪，船程大約一個半小時，上船後船公司的職員會向乘客收取護照，以統一交給麗貝島的海關。而10月中至11月中以及4月中至5月中由於大浪的關係，每日早上只有一班船會開往麗貝島，其他時間每日就有兩班。建議大家在出發前一個月找旅遊公司代訂船票，往返船票包酒店或者機場接送，留意官方網站上的價錢唔平仲唔包接送服務添架！
幾時去最好？
雖然麗貝島未算是非常普及的旅遊區，但都有分旅遊季節，淡季就是4月底至10月中，而旺季就是10月尾至4月中，每逢旺季期間，麗貝島上的酒店價格都會上升不少，普通房都要大約港幣700蚊一晚。但淡季去麗貝島又唔一定有着數，很多商店和餐廳在淡季期間都不營業，大家想捱貴房但享受熱鬧的氣氛，定想平平地去旅行遠離人煙咁度假，就自己決定喇！
麗貝島有咩玩？
去到海上小島，必玩的一定是浮潛啦！好多酒店都有得訂Snorkeling One Day Trip島上一日出海跳島行程，有各種套餐選擇提供，不同價格包不同門票、潛水鏡、蛙鞋、救生衣和午餐等等，大家記得問清楚至好俾錢喇！若然你的要求唔高，可以揀最平的套餐Sunset Trip，只是大約港幣一百幾蚊，就可以玩曬各個特色無人小島，相比起在著名旅遊城市玩真係抵好多！行程有得睇魚睇珊瑚，同其他景點觀光，仲包埋午餐，實在超值！有潛水牌的人，仲可以參加埋進階版的深潛，一覽麗貝島的海底世界。
麗貝島有咩靚？
話明係泰國版的馬爾代夫，各個景點當然都係靚到dum一聲啦！麗貝島上有三個沙灘一定是必去，分別是日出沙灘（Sunrise Beach）、芭堤雅沙灘（Pattaya Beach）和日落沙灘（Sunset Beach）。日出沙灘的長度為三個沙灘之中最長，附近有Resort和Lounge Bar，交通方便，環境又寧靜，十分推薦大家揀喺呢度book酒店，附近亦有典型的海景小屋可供租住，價錢相宜，大約港幣350蚊一晚，但冇熱水冇冷氣，而且經常客滿 ! 如果大家想一起身就對住個無敵大海景食早餐，就要早啲預訂，坐喺日出沙灘上吹住溫暖的海風，望住大大的金黃色日出，真是無價享受！
由於外海上有海島接駁船，從馬來西亞到泰國的海關關口和廉價航空的小島接駁報到櫃檯都在芭堤雅沙灘，所以芭堤雅沙灘由朝到晚都非常繁忙吵鬧。而且，由於沙灘上有不少餐廳和夜店，入夜後的芭堤雅沙灘就真係好似芭堤雅一樣咁熱鬧，簡直係麗貝島的不夜城！芭堤雅沙灘上的沙呈奶白色，藍天白雲、水清沙幼，真正人間天堂！ 建議大家用徒步環島的方式遊芭堤雅沙灘，定能發現到更多世外桃園！芭堤雅沙灘附近仲有個夜市－Walking Street，玩完去行街食野，食完野去睇火舞表演，都是一個唔錯的選擇！
最後，日落沙灘雖然交通不方便，但勝在環境優美寧靜，而且顧名思義，一定是睇日落的好地方，唔可以唔到此一遊！日落沙灘最引人入勝的地方，就是它和日出沙灘的交界，會因為潮汐而形成一個白色的淺灘，靚到連泰國旅遊局都用來做旅遊推廣照片！日頭在淺灘上面玩，傍晚坐在沙灘上聽住海浪聲睇日落，真是一級享受 !
麗貝島有咩食？
麗貝島上有唔少特色餐廳，各個沙灘附近都有好多餐廳比你選擇！例如日出沙灘上的Sunrise Beach Restaurant，是一家泰式餐飲店，不單止提供各式餐點，仲提供玩水玩具出租。而講到芭達雅沙灘，不得不提的一定是附近的夜店啦 ! 坐在Barracuda Bar內飲下酒放鬆下，睇下火舞表演，你會覺得不柱此行！而在日落沙灘， 在Mountain Resort 歎住個靚景飲下咖啡，都是一個不錯的選擇。當然，講到最多食物選擇的，一定是Walking Street 啦！熱辣辣想食個雪糕，可以去Lekka Lipe食手工冰淇淋；想食傳統泰式香蕉煎餅都可以嚟到Walking Street，街上有至少3間舖賣香蕉煎餅，煎餅加冰淇淋，真是超正！
正餐的選擇當然都唔少，想食印度菜，可以光顧Shafik Indian restaurants ; 食地中海風味菜式，可以去 The Box ; 想食皮薄又脆口、地道的現烤手工Pizza，就可以到La Cantina Italian Restaurant ; 偽文青想歎杯咖啡、享受下寫意氣氛的話，悠閒的Elephant Coffee House & Bar實啱你，仲可以玩埋漂書活動添！
介紹咗咁多個麗貝島嘅靚景同玩樂好去處，係咪已經心郁郁想去番轉呢？今個暑假唔想再去大城市行街買野、只想好好享受下陽光與海灘？泰國麗貝島一定啱曬你！
旅遊小Tips
簽證：持有效特區護照或BNO毋須簽證
貨幣：HK$1約兌THB4.5
機票：國泰來回香港及曼谷，經濟客位$1,863起（連稅）。
文：Noelle
熱門空缺
