職場資訊
大學生最想入邊間地產商做MT？
刊登日期: 2016-06-20
依家間間公司都講究企業形象，不過大灑金錢落完一輪廣告之後，市民同求職者點諗又係另一回事。客觀啲，仿效梁啟智，向Google大神問吓10間基本上市民都應該噏得出名既發展商，由關聯詞睇吓大家對佢地有乜印象。
方法：打開Chrome用無痕式視窗上Google香港，然後輸入10間發展商簡稱，再襟多吓Space Bar，咁就會出到10個聯想結果。
- 咁大部份發展商都會有一半左右嘅聯想字係同旗下樓盤名、有樓盤推售的地區之類嘅地產野扯上關係。呢個結果對路，始終準買家同地產代理買樓前總要做資料搜查，關聯詞的排名自然愈推愈高。
- 不過，新世界及恒隆關於招聘的聯想詞多於地產領域，尤其是大學畢業生爭崩頭的「MT」（Management Trainee、即管理人員訓練計劃或見習行政人員）位置相當靠前，相信是年初MT招聘時大批準畢業生見工前做準備，將相關字眼推前排名。特別是新世界10個聯想結果裡唔見任何樓盤名，反而關於星光大道的爭議榜上有名。
- 嘉里與「MT」的聯想結果排名亦同樣靠前，但出奇地，嘉里與高登扯上關係，是10間發展商唯一一間。睇吓「嘉里＋高登」搜查結果，主要圍繞嘉里物流（636）與嘉里（683）就業前景。個人推斷係師兄姐向後輩傳授求職方向時，提醒畢業生申請MT前要分清楚2間公司，千祈唔好申請錯，講果時拋低一句「唔明就自己上高登睇吓！」
- 同樣設有MT計劃多年的新地，改以新鴻基作搜查便會出現關聯詞招聘(第2)、INTERN(第8)及MT(第10)。
- 出乎意料，與新世界、新地一樣位列本港五大老牌發展商的信置亦有設MT計劃，關聯詞之內卻不包括MT，唔通大學生竟將信置睇低一線？
- 收租王恒隆雖然響發展商之間算低調，但其MT計劃看來在大學生之間有相當名氣，不過，相信部份同學申請前將恒隆與恒基混淆。
- 只有3個揸盤人（負責新盤銷售的高層／操盤手）與發展商的聯想結果靠前，分別係新地雷霆、信置田兆源及嘉華溫偉明，三者的共通點之一是推盤時招開的記者會密集程度驚人，其中一人今年的經典之作是某日1小時內特意在2個地方為2個樓盤舉行2個獨立記招。
- 長實今年年初用百萬年薪招聘中文主任嘅事相當震撼網民。
- 恒地古洞收地一事受關注程度高於公司業績同旗下樓盤，關聯詞之中亦無任何求職相關。
- 嘉華、會德豐同華懋的聯想結果中不約而同出現「樓」同「質素」，睇黎市民對呢3間中小型發展商起樓質素抱有疑問。
資料來源：apple daily
熱門空缺
